هه‌ر پێداچوونه‌ك مروڤ د ژيانا پێغه‌مبه‌رىَ خودىَ دا بكه‌ت سلاڤ لسه‌ر بن دىَ به‌هرا پتر ژ لايه‌نێن ژيانىَ تێدا خويا بن ژبه‌ر هندىَ هه‌كه‌ مروڤ دێڤچونه‌كىَ بۆ رِه‌وشه‌نبيرييا ئيسلامى بكه‌ت و ب تايبه‌ت ئه‌و نڤيسين و ديڤچوون و ڤه‌كولَينێن لسه‌ر ژيانا خوشتڤى هاتينه‌ نڤيسين سلاڤ لسه‌ر بن دىَ بينى گه‌له‌ك لايه‌نێن ژيانىَ و كه‌سايه‌تييىَ بخوڤه‌ دگرن
جوره‌كىَ ڤان نڤيسينا دىَ به‌حسىَ ژيانا پێغه‌مبه‌رى كه‌ت سلاڤ لسه‌ر بن ب رِه‌نگه‌كىَ گشتى،جوره‌كىَ دى به‌حسىَ ژيانا وى دكه‌ت سلاڤ لسه‌ر بن د مه‌يدانا سياسى دا ،هه‌روه‌سا جوره‌كىَ دى به‌حسىَ خوشتڤى دكه‌ت د مه‌يدانا له‌شكه‌رى دا يان جوره‌كىَ دى به‌حسىَ ژيانا پێغه‌مبه‌رى دكه‌ت سلاڤ لسه‌ر بن د مه‌يدانا بانگه‌وازييىَ دا
ب ڤى رِه‌نگى دىَ ئه‌ڤان بابه‌تا و هه‌مى مه‌يدانێن دى يێن ژيانىَ د كه‌ساتييا پێغه‌مبه‌رى دا خوينن
ژبلى هندىَ كۆ ب رِه‌نگه‌كىَ به‌رفره‌ه و شلوڤه‌كرى به‌حسىَ هه‌مى بياڤ و هويرترين لايه‌نێن ژيانا خوشتڤى هاتيه‌ كرن
***
لىَ جوره‌كىَ كتێب و نڤيسينا ب رِه‌نگه‌كىَ تايبه‌ت هه‌نه‌ دبێژنىَ( سالَوخێن ته‌ڤگرێن پێغه‌مبه‌رى) سلاڤێن خودىَ لسه‌ربن به‌حسىَ هه‌مى لايه‌نێن ژيانا پێغه‌مبه‌رى سلاڤ لسه‌ربن دئێته‌ كرن ، ب تايبه‌تى لايه‌نىَ رِوحى و كارتێكرنا وى د ژيانا خوشتڤى دا هه‌روه‌سا به‌رِنامىَ رِوحى يىَ پێغه‌مبه‌رى سلاڤ لسه‌ربن د هه‌مى مه‌يدانێن ژيانىَ دا
لىَ خالَه‌كا دى يا گرنگ يا هه‌ى وه‌ك لايه‌نىَ رِوحى و هێزا غه‌يبىَ د هه‌مى ژيانا پێغه‌مبه‌رى دا سلاڤ لسه‌ربن هه‌ر ژ رِۆژا هاتيه‌ سه‌ر دونيايىَ و خودايىَ مه‌زن ئه‌ڤ دنيايه‌ ب هاتنا وى رِۆن كرى و هه‌تا چوويه‌ به‌ر دلوڤانييا خودىَ .
***
ب هاريـــــكارييا خودىَ و لبن سيبه‌را رِه‌وشه‌نبيرييا ژيانا پێغه‌مبه‌رى سلاڤ لسه‌ر بن دىَ چه‌ند خالَێن سه‌ره‌كى دياركه‌ين كا چاوا ده‌ستىَ غه‌يبىَ و شيانا خودىَ دگه‌ل پێغه‌مبه‌رى بۆ سلاڤ لسه‌ربن
1- ده‌مىَ پێغه‌مبه‌رىَ خودىَ هاتيه‌ سه‌ر دونيايىَ هه‌ر د ڤىَ بوونىَ دا ديارده‌كا گه‌له‌كا مه‌زن سه‌رسورمان دبوونا وى دا په‌يدا بۆ ئه‌و داپيروژكێن هاريكارييا ئامينايىَ دكر د نه‌خوشييا وىَ دا و د بوونا پێغه‌مبه‌رى دا سلاڤ لسه‌ر بن دبێژن لگه‌ل بوونا پێغه‌مبه‌رى سلاڤ لسه‌ربن رِۆناهييه‌ك ديار بوو رِۆژ هه‌لات و رِۆژ ئاڤا رِۆن كرن
يا دياره‌ ژى كا ئه‌ڤ رِۆناهييه‌ مزگينى يا چيه‌ و هێمايىَ چ په‌يامه‌ كۆ لگه‌ل بوونا خوشتڤى بوى ب ڤى رِه‌نگى و رِۆناهى ژبوونا وى په‌يدا بۆ كا چاوا بوونه‌ك ژ بوونا وى په‌يدا بوى.
2- پشتى پێغه‌مبه‌ر سلاڤ لسه‌ربن د قويناغێن ژيىَ خوه‌دا مه‌زن دبيت و هه‌ر ب رِه‌نگه‌كىَ به‌رده‌وام كا چاوا به‌رى بوونا وى بابىَ وى مرى و پشتى بوونا وى ده‌يكا وى مرى ,پێغه‌مبه‌رى سلاڤ لسه‌ربن د هنێرنه‌ بيابانىَ دا ل وێرىَ ب رِه‌نگه‌كىَ پاقژ و جوان بێته‌ په‌روه‌رده‌ كرن هه‌روه‌سا دا زمانىَ عه‌ره‌بى يىَ دورست بزانيت ، ژنكه‌ك دبيته‌ دايينا وى ب ناڤىَ حه‌ليما سه‌عدي و پێغه‌مبه‌رى ب خودان دكه‌ت
ل وێرىَ ژى رِويدانه‌كا گه‌له‌كا مه‌زن و سه‌رسورمان بۆ پێغه‌مبه‌رى سلاڤ لسه‌ربن چێدبيت هێژ ژيىَ پێغه‌مبه‌رى شه‌ش سالَ بوون دگه‌ل زارِۆكا يارى دكرن دوو فريشته‌ دئێن پێغه‌مبه‌رى دگرن و دلىَ وى دئيننه‌ ده‌رىَ و د ته‌سته‌كىَ دا دشون و لايه‌نىَ خرابى و شه‌رى ژ دلىَ وى رادكه‌ن و ئه‌و زارِۆكێن دگه‌ل هه‌مى دبينن..ژىَ د رِه‌ڤن و د چن دبێژنه‌ خه‌لكىَ عربانى هنده‌ك زه‌لام هاتن ئه‌و زارِۆكىَ قوره‌يشى گرت
گومان تێدا نينه‌ ئه‌ڤه‌ لبن چاڤدێرييا خودىَ و ب هێزه‌كا غه‌يبى يا ب رێڤه‌ چوى ئه‌ڤ رويدانه‌.
3- پشتى پێغه‌مبه‌ر سلاڤ لسه‌ربن مه‌زن دبيت و مامىَ وى بابىَ تالبى چاڤدێرييا وى دكه‌ت ب رِه‌نگه‌كىَ به‌رده‌وام كارتێكرنا غه‌يبىَ د ژيانا ويدا ديار دكه‌تن و هه‌تا ئه‌و هه‌ست بۆ چێببيت كۆ ئه‌وژى هزرا خوه‌ د جيهانه‌كا دى دا بكه‌ت،ژبه‌ر هندىَ پێغه‌مبه‌ر سلاڤ لسه‌ربن دبێژيت گه‌له‌ك جارا ئه‌ز د رێبار و كولانێن مه‌ككهىَ را دا ئێم و چم دار و به‌را سلاڤى من دكر يان پێغه‌مبه‌ر سلاڤ لسه‌ربن دا جاره‌كىَ چيته‌ پێش شه‌هيانه‌كىَ شه‌ڤه‌كىَ خودايىَ مه‌زن د خه‌و بر هه‌تا شه‌هيان ب دوماهى هاتى و بوويه‌ رِۆژ ژبه‌ر گه‌رما تاڤىَ هشيار بووى.
4- هه‌روه‌سا پشتى پێغه‌مبه‌ر دگه‌هيته‌ ژيىَ زه‌لامينييىَ و ده‌ست ب كارى دكه‌تن و خالَا پێغه‌مبه‌رينييىَ دناڤ مللێن ويدا ئاشكه‌را دبيت دبيته‌ مروڤه‌كىَ رِاستگوو دناڤ هه‌مى ته‌خه‌يێن خڤاكى دا و خه‌لك هه‌مى باوه‌ريىَ پىَ دئينن و هه‌ر خه‌ونه‌كا دبينيت دبيته‌ ( ژخه‌ونێن رِاستگوو) هه‌روه‌سا ئه‌و خه‌ون د واقعىَ ژيانىَ دا دهاته‌ بجه ئينان
ئه‌ڤه‌ژى دياره‌ كۆ خه‌ونێن پێغه‌مبه‌را وه‌حى نه‌ و و ژ جيهانا غه‌يبىَ دئێن .
5- ئه‌ڤ رِويدان و ديارده‌ هه‌مى دبنه‌ ئه‌گه‌را هندىَ كۆ پێغه‌مبه‌رى سلاڤ لسه‌ربن پالَڤه‌ده‌ن بكه‌ڤيته‌ خلوىَ د شكه‌فتا حه‌رائىَ دا ، ب رِه‌نگه‌كىَ به‌رده‌وام و لسه‌ر دينىَ ئيبراهيم پێغه‌مبه‌ر سلاڤ لسه‌ربن پێغه‌مبه‌رى عيباده‌تىَ خودىَ دكر و هزرا خوه‌ د جيهانىَ دا دكر هه‌تا بوويه‌ ئه‌گه‌را هندىَ كۆ مه‌زنترين غه‌يب و لايه‌نىَ رِۆحى بۆ پێغه‌مبه‌رى سلاڤ لسه‌ربن دياربووى و خودايىَ مه‌زن بريار داى موحه‌ممه‌د ببيته‌ پێغه‌مبه‌رىَ دويماهييىَ و خودانىَ په‌ياما دويماهييىَ .
6- پشتى پێغه‌مبه‌ر سلاڤ لسه‌ربن شه‌ره‌فا په‌ياما خودىَ وه‌رگريتن ب رِه‌نگه‌كىَ رِاسته‌وخوو هه‌روه‌سا ب شه‌ڤ و ب رِۆژ،هه‌روه‌سا د هه‌مى مه‌يدانێن ژيانىَ دا ، هه‌روه‌سا دهه‌مى خه‌بات و بزاڤان دا ده‌ستىَ غه‌يبىَ لگه‌ل پێغه‌مبه‌رى سلاڤ لسه‌ربن يىَ ئاشكرايه‌.
دىَ چه‌ند لايه‌نه‌كا وه‌ك نموونه‌ ئاشرا كه‌ين ،چنكى گومان تێدا نينه‌ نڤيسينا ب ڤى رِه‌نگى دڤێت ببيته‌ بنياتىَ په‌رتووكه‌ك و ديراسه‌ته‌كا تايبه‌ت .
1- هه‌ڤالينييا جبرائيلى بۆ پێغه‌مبه‌رى و ئينانا وه‌حييىَ ب رِه‌نگه‌كىَ به‌رده‌وام.
2- پاراستنا خوشتڤى سلاڤ لسه‌ربن ژ هه‌مى رِه‌نگێن دوژمنا د هه‌مى مه‌يدانێن ژيانىَ دا.
3- هه‌روه‌سا رويدانه‌كا غه‌يبى و گه‌له‌كا مه‌زن بۆ پێغه‌مبه‌رى سلاڤ لسه‌ربن چێدبيت كۆ هه‌مى خه‌لكىَ ده‌وروبه‌ر ژ باش و خرابا پىَ دئاغڤن ، ئه‌وژى چونا پێغه‌مبه‌رىَ خودىَ بۆ سلاڤ لسه‌ربن بۆ عه‌سمانا.
4- ده‌ركه‌فتنا پێغه‌مبه‌رى سلاڤ لسه‌ربن ل رِۆژا مشه‌خت بوونىَ.
5- پاراستنا پێغه‌مبه‌رى سلاڤ لسه‌ربن و ئه‌بوو به‌كرى د شكه‌فتىَ دا ب شێوازه‌كىَ تايبه‌ت .
6- ئه‌و كه‌سىَ هاتييه‌ ئاماده‌كرن كۆ بچيت پێغه‌مبه‌رى سلاڤ لسه‌ربن بگريت كا چاوا عه‌ردى حێشترا وى دگرت و ئه‌وژى د حێشترىَ دا دكه‌ت.
7- هه‌تا پێغه‌مبه‌رىَ خودىَ سلاڤ لسه‌ربن دچيته‌ باژێرىَ مه‌دينىَ ل وێرىَ دياردێن غه‌يبى و رِوحى دبنه‌ تشته‌كىَ ئاشكرا ل پێش چاڤێن هه‌مى خه‌لكى هه‌ڤالَ و دوژمن هه‌مى دزانن كۆ موحه‌ممه‌د پێغه‌مبه‌رىَ خودىَ يه‌ ڤێجا چ ب سه‌ره‌دانا فريشتا بيت بۆ پێغه‌مبه‌رى هه‌روه‌كى جبرائيل هاتيه‌ ده‌ف پێغه‌مبه‌رى يان ئه‌و موعجيزێن خودايىَ مه‌زن داينه‌ پێغه‌مبه‌رى سلاڤ لسه‌ربن ژمارا وان ژ هزارا دبوريتن يان هنده‌ك كارێن تايبه‌ت بوون ب كه‌ساتييا پێغه‌مبه‌ريڤه‌ سلاڤ لسه‌ربن وه‌ك رِۆژيگرتنىَ دوو شه‌ڤ و دوو رِۆژا بێى برسى ببيت و هه‌تا دويماهييىَ ، ئها  ب ڤى رِه‌نگى هه‌كه‌ مروڤ هوير تر به‌رىَ خوه‌ بده‌ته‌ ژيانا خوشتڤى دىَ بينيت يا پرِه‌ ژ ديارده‌ و رويدانێن غه‌يبى و رِوحى دگه‌ل ده‌ستىَ شيانا خودايىَ مه‌زن د هه‌مى ژيانا خوشتڤى دا هه‌ر ژ بوونىَ و هه‌تا دگه‌هيته‌ وه‌فات كرنىَ.